Mpwayungu Yaibuka Kidedea Bonanza Uchaguzi Serikali Za Mitaa

Imewekwa: November 17th, 2024

Mchezo wa bonanza kuelekea uchaguzi wa Serikali za mitaa utakaofanyika Novemba 27 kati ya Mpwayungu FC na Ngh'ambako FC ambao umechezwa Novemba15, 2024 na  kumalizika kwa timu mwenyeji ya Mpwayungu kuibuka na ushindi wa goli 4 dhidi ya 1 la Ngh'ambaku.

Mchezo huo ambao ulipigwa mbele ya mgeni rasmi Mkuu wa Wilaya ya Chamwino Mh. Janeth Mayanja ulichezwa katika kata ya Mpwayungu, Halmashauri ya Wilaya ya Chamwino na timu ya Mpwayungu kujipatia zawadi ya seti mpya ya jezi na mpira mpya kwa Nambako walioshika nafasi ya pili.

Akizungumza wakati akikabidhi zawadi kwa washindi wa mchezo huo Mh. Janeth Mayanja amewaomba wadau wote wa michezo wa Mpwayungu na Chamwino kwa ujumla waliojitokeza katika bonanza hilo kujitokeza siku ya Jumatano ya tarehe 27 Novemba 2024 kupiga kura kuchagua viongozi wao wa Kijiji na kitongoji.

Mh. Mayanja aliendelea kwa kuwahasa wananchi hao kuwachagua viongozi wa kijiji na kitongoji watakao hudumia wananchi kwa upendo, na wenye busara, hekima, uadilifu na uzalendo na watakaovusha maendeleo ya vijiji vyao kwa kipindi cha miaka mitano. Aidha amezipongeza timu zote mbili kwa kuwa na mchezo mzuri na kuonyesha vipaji vyao.

Zoezi la kupiga kura uchaguzi wa Serikali za Mitaa litafanyika tarehe 27 Novemba 2024 na vituo kufunguliwa saa 2:00 asubuhi na kufungwa saa 10:00 kamili jioni.

Serikali za Mitaa Sauti ya Wananchi, Jitokeze Kushiriki Uchaguzi.